Imdad Imam Asar
qaid-e-tan se ruuh hai nashad kya
chand-roza umr ki mi.ad kya
meri iiza se adu ho shaad kya
tujh pe takiya o sitam-ijad kya
un ki ḳhatir jaa.en bazm-e-ghair men
arzu-e-jannat-e-shaddad kya
pa raha hai dil musibat ke maze
aa.e lab par shikva-e-bedad kya
dil men jo aa.e use kah Daliye
aap ki baten karenge yaad kya
dosto aa.e hain vo dushman ke saath
mujh ko dete ho mubarakbad kya
jab nahin kuchh e’tibar-e-zindagi
is jahan ka shaad kya nashad kya
kuchh agar tasir rakhti hai to khinch
varna ai dil hasil-e-fariyad kya
jab ba-rang-e-gul hai paband-e-makan
bandhte hain sarv ko azad kya
hai tira pamal har naḳhl-e-chaman
tere aage sarv kya shamshad kya
yaar ki tasvir dil par khinch li
khinchte ham minnat-e-bahzad kya
ghair dil se ek dam jaata nahin
ham tujhe aa.en sitamgar yaad kya
mujh se pahle sun chuke hain ghair ki
vo mire haq men karen irshad kya
sar Tapakte hain asiran-e-qafas
hai chaman ki ai saba rudad kya
ashiqi hai sar pe lena koh-e-gham
nazish-e-sar bazi-e-farhad kya
arz apni hai jo hai arz-e-adu
dekhiye karte hain vo irshad kya
sar-kashi tujh se kare kya taab hai
aadmi ki ai ḳhuda buniyad kya
be-haqiqat jaan kar dil ko ‘asar’
to ne ai nadan kiya barbad kya
Leave a Reply