Tumhaare Hijr Mein Rahta Hai Hum Ko Gham Miyan-Sahib

tumhare hijr men rahta hai ham ko gham miyan-sahib

ḳhuda jaane jiyenge ya marenge ham miyan-sahib

agar bosa na dena tha kaha hota nahin deta

tum itni baat se hote ho kya barham miyan-sahib

ḳhata kuchh ham ne ki ya ghair hai shayad tumhen maane

sabab kya hai ki tum aate ho ab kuchh kam miyan-sahib

agar tu shohra-e-afaq hai to tere bandon men

hamen bhi janta hai ḳhuub ik aalam miyan-sahib

tumhare ishq se ‘taban’ hua hai shahar men rusva

tum us ke haal se ab tak nahin mahram miyan-sahib

Leave a Comment