Umair Najmi
kuchh safine hain jo gharqab ikaTThe honge
aankh men ḳhvab tah-e-ab ikaTThe honge
jin ke dil joḌte ye umr bita di main ne
jab marunga to ye ahbab ikaTThe honge
muntashir kar ke zamanon ko khangala jaa.e
tab kahin ja ke mire ḳhvab ikaTThe honge
ek hi ishq men donon ka junun zam hoga
pyaas yaksan hai to sairab ikaTThe honge
mujh ko raftar chamak tujh ko ghaTani hogi
varna kaise zar-o-simab ikaTThe honge
us ki tah se kabhi daryaft kiya ja.unga main
jis samundar men ye sailab ikaTThe honge
Leave a Reply