Siraj Lakhnavi
ashk-e-hasrat men kyuun lahu hai abhi
sulh ki un se guftugu hai abhi
dil pasheman-e-justuju hai abhi
khoi khoi si aarzu hai abhi
chak-e-dil par na kyuun hansi aa.e
ye to sha.ista-e-rafu hai abhi
muskura len haqiqaten mujh par
naqsh-e-batil ki justuju hai abhi
jalve betab aur nazar bechain
naam donon ka justuju hai abhi
ḳhairiyat dil ki puchhne vaale
chain se teri aarzu hai abhi
kaise phandega baagh ki divar
tu giraftar-e-rang-o-bu hai abhi
dam ghuTa jaata hai mohabbat ka
band hi band guftugu hai abhi
saikḌon aa.ine badal Daale
apni hi shakl ru-ba-ru hai abhi
gul hain atish-kade ḳhudi ke ‘siraj’
sard insan ka lahu hai abhi
Leave a Reply