Kam Ranj Mausam-E-Gul-E-Tar Ne Nahin Diya

Saleem Faraz

kam ranj mausam-e-gul-e-tar ne nahin diya

dil ke kisi bhi zaḳhm ko bharne nahin diya

saare hi mustafiz hue us ki zaat se

ham ko hi ek phal bhi shajar ne nahin diya

murjha ga.i hai talḳhi-e-halat se magar

kam hai ki ham ne yaad ko marne nahin diya

jalta charagh-e-dil shab-e-hijran men der tak

mauqa.a magar numud-e-sahar ne nahin diya

maḳhsus thi bas us ke liye dil ki guzar

ham ne kisi ko yaan se guzarne nahin diya

ham par zamin ka ek sitara hai multafit

ruḳh par ye nuur shams-o-qamar ne nahin diya

kuchh to charagh-e-zist ki lau bhi thi na-tavan

aur kuchh hava ne us ko ubharne nahin diya

ham bhi the zindagi se gurezan tamam raah

shane pe haath is ne bhi dharne nahin diya