Shauq Bahraichi
aansu miri ankhon se Tapak jaa.e to kya ho
tufan koi phir aa ke dhamak jaa.e to kya ho
bas is liye rahbar pe nahin mujh ko bharosa
buddhu hai vo ḳhud raah bhaTak jaa.e to kya ho
achchhi ye tasavvur ki nahin dast-darazi
angiya kahin is but ki masak jaa.e to kya ho
vaa.iz ye gulistan ye baharen ye ghaTa.en
saghar koi aise men khanak jaa.e to kya ho
ye chah-kani mere liye bani-e-bedad
tu ḳhud isi koiyan men luḌhak jaa.e to kya ho
ghurbat se miri sub.h o masa khelne vaale
tera bhi divala jo khisak jaa.e to kya ho
ye bar-e-amanat tu uThata to hai lekin
nazuk hai kamar teri lachak jaa.e to kya ho
ruk ruk ke zara haath baḌha ḳhvan-e-karam par
luqma koi jaldi men aTak jaa.e to kya ho
main qaid huun par ah-e-rasa qaid nahin hai
vo jail ki divar taḌak jaa.e to kya ho
ai saqi-e-gulfam zara soch le ye bhi
kulhaḌ tiri hasti ka chhalak jaa.e to kya ho
jallad se ai ‘shauq’ main ye puchh raha huun
tu bhi yunhi phansi pe laTak jaa.e to kya ho
Leave a Reply