munh pher kar vo kahte hain bas maan ja.iye
is sharm is lihaz ke qurban ja.iye
bhule nahin hain ham vo mudarat raat ki
ji chahta hai phir kahin mehman ja.iye
bole vo muskura ke bahut iltija ke ba.ad
ji to ye chahta hai tiri maan ja.iye
aage hai ghar raqib ka bas saath ho chuka
ab aap ka ḳhuda hai nigahban ja.iye
ulfat jata ke dost ko dushman bana liya
‘beḳhud’ tumhari aql ke qurban ja.iye
Leave a Reply