jo mumkin ho to soz-e-sham.a parvane men rakh dena
ab is afsane ka unvan afsane men rakh dena
baḌi kafir kashish iman men hai ai azim-e-ka.aba
na le jaana dil apne saath but-ḳhane men rakh dena
mira dil bhi sharab-e-ishq se labrez hai saaqi
ye botal bhi uḌa kar kaag maiḳhane men rakh dena
abhi a.ina-e-tasvir abhi hushyar abhi ghafil
tumhen aata hai har andaz divane men rakh dena
mira paimana-e-hasti agar saaqi chhalak jaa.e
mire hisse ka ḳhali jaam maiḳhane men rakh dena
sharik-e-mai janab-e-shaiḳh bhi ho ja.enge saaqi
zara zarf-e-vazu ka Dhang paimane men rakh dena
ye kya dast-e-ajal ko kaam saunpa hai mashiyyat ne
chaman se toḌna phuul aur virane men rakh dena
vafur-e-yas men ‘qaisar’ chale hain dil se chand aansu
ye lashen hain inhen ankhon ke ḳhas-ḳhane men rakh dena
Leave a Reply