Markaz-E-Dahr Zat Meri Hai

markaz-e-dahr zaat merī hai

rashk-e-duniyā hayāt merī hai

ye zamīñ ye falak ye bahr-o-bar

ye hasīñ kā.enāt merī hai

merī ḳhātir nikaltā hai sūraj

din hai merā ye raat merī hai

varaq-e-gul pe sher haiñ mere

baat bhī paat paat merī hai

sach kī sūrat kahī hai jis ne bhī

sach to ye hai vo baat merī hai

kyā huā agar nahīñ mirā qabza

phir bhī kul kā.enāt merī hai

terī qismat ho yā mirī ‘jāmī’

jo bhī hai tere saath merī hai

Leave a Comment