Mushkil Ko Zara Chhod Ke Aasan Ke Bare

mushkil ko zara chhoḌ ke asan ke baare

kuchh soch miri tangi-e-daman ke baare

ik tere bulave pe bahal jaata hai varna

ma.alum hai mujh ko dil-e-nadan ke baare

aghaz-e-mohabbat men tavakkul hai zaruri

mat soch kisi faeda nuqsan ke baare

is shahr men har shaḳhs ko sone ki paḌi hai

halanki bataya bhi hai tufan ke baare

is basti-e-ḳhush-ab ki pur-kaif fazaen

kab sochne deti hain paristan ke baare

khone ki tujhe mujh ko vahi fikr hai lahiq

hoti hai musafir ko jo saman ke baare

‘ajiz’ tiri duniya ke ye insan ajab hain

insan ko bahkate hain yazdan ke baare

Leave a Comment