Anis Abr
har ek pal mujhe dukh dard be-shumar mile
ḳhuda kabhi to mere dil ko bhi qarar mile
zamana dushman-e-jan ho gaya ye gham hai magar
mira nasib ki ḳhanjar ba-dast-e-yar mile
kya hogi is se bhi baḌh kar kisi ki mahrumi
jise nasib men ta-marg intizar mile
ai alamin ke raziq bata kahan ja.un
mire vatan men mujhe jab na rozgar mile
rahe vo zinda ya mar jaa.e farq kya hai jise
ghuTan zamane men aur qabr men fishar mile
main muskurata magar di na ashk ne mohlat
ḳhushi jab ek mili saath gham hazar mile
jo jhuuT bole hukumat se daad le jaa.e
jo bole sach use tohfe men auj-e-dar mile
falak pe likkhun tira naam mere naam ke saath
agar kabhi mujhe taron par iḳhtiyar mile
main jin se duur hi rahna pasand karta tha
vo zindagi ki masafat men baar baar mile
ḳhushi se ‘abr’ har ik rabt munqata.a kar do
agar kahi koi duniya men sogvar mile
Leave a Reply