gul tira rang chura laae hain gulzaron men
jal raha huun bhari barsat ki bauchharon men
mujh se katra ke nikal ja magar ai jan-e-haya
dil ki lau dekh raha huun tire ruḳhsaron men
husn-e-be-gana-e-ehsas-e-jamal achchha hai
ghunche khilte hain to bik jaate hain bazaron men
zikr karte hain tira mujh se ba-unvan-e-jafa
chara-gar par piro laae hain talvaron men
zaḳhm chhup sakte hain lekin mujhe fan ki saugand
gham ki daulat bhi hai shamil mire shahkaron men
muntazir hain ki koi tesha-e-taḳhliq uthae
kitne asnam abhi dafan hain kohsaron men
mujh ko nafrat se nahin pyaar se maslub karo
main to shamil huun mohabbat ke gunahgaron men