machalti hai mire aghosh men ḳhushbu-e-yar ab tak
miri ankhon men hai is sehr-e-rangin ka ḳhumar ab tak
koi aata nahin ab dil ki basti men magar phir bhi
umidon ke charaghon se hain raushan rahguzar ab tak
abhi tak nisf shab ko chandni gaati hai jharnon men
nahin badli shabab-e-muntazir ki yadgar ab tak
jala rakkhe hain shahrahon pe ashkon ke diye kab se
nahin guzra kabhi is samt se vo shahsavar ab tak
shikast-e-arzu ko ishq ka anjam kyuun samjhun
muqabil hai mire aina-e-lail-o-nihar ab tak