Ali Ahmad Jalili
kaaTi hai gham ki raat baḌe ehtiram se
aksar bujha diya hai charaghon ko shaam se
raushan hai apni bazm aur is ehtimam se
kuchh dil bhi jal raha hai charaghon ke naam se
muddat hui hai ḳhun-e-tamanna kiye magar
ab tak Tapak raha hai lahu dil ke jaam se
sub.h-e-bahar ham ko bulati rahi magar
ham khelte rahe kisi zulfon ki shaam se
har saans par hai maut ka pahra laga hua
ahista ai hayat guzar is maqam se
kaaTi tamam umr fareb-e-bahar men
kanTe sameTte rahe phulon ke naam se
ye aur baat hai ki ‘ali’ ham na sun sake
avaz us ne di hai hamen har maqam se
Leave a Reply