Isko Koi Gham Nahin Hai Jis Ka Ghar Patthar Ka Hai

Poet

is ko koi gham nahin hai jis ka ghar patthar ka hai

kya karega tez tufan bam-o-dar patthar ka hai

aise insan se kabhi ummid kya rakhe koi

dekhne men aadmi hai dil magar patthar ka hai

kaun sa hai shahr jis men main bhaTak kar aa gaya

raste patthar ke hain aur bam-o-dar patthar ka hai

aa ga.e hain aag ki zad men hazaron jhonpaḌe

mujh ko lekin hai tasalli apna ghar patthar ka hai

apne daman men chhupa.en kyuun nahin bachche inhen

hain sabhi TuuTe khilaune phir bhi Dar patthar ka hai

un se ummid-e-vafa rakhna bhi ‘nayyar’ hai fuzul

be-muravvat sab ke sab hain aur nagar patthar ka hai