Wamiq Jaunpuri
is tarah se kashti bhi koi paar lage hai
kaghaz ka bana haath men patvar lage hai
azad lage hai na giraftar lage hai
divane ko dar ahani divar lage hai
ik laash hai lekin baḌi jan-dar lage hai
shola si koi chiiz sar-e-dar lage hai
pahchan lo us ko vahi qatil hai hamara
jis haath men TuuTi hui talvar lage hai
ḳhamosh giran-bar fazaon men ghuTan si
ye to kisi tufan ki lalkar lage hai
ik vaqt vo tha jab rasan-o-dar men tha lutf
ab lutf bhi un ka rasan-o-dar lage hai
din chaḌhne laga tezi se ghaTne lage saa.e
raahi koi ham ko pas-e-divar lage hai
ik da.era-e-fikr men mahdud hai aalam
har pa-e-nazar surat-e-parkar lage hai
sunne men to ghazlen bahut achchhi lagin ‘vamiq’
qirtas pe ik aisi jo shahkar lage hai
Leave a Reply