Shams Fareedi
is jahan-e-be-jahan men dil laga pavenge kya
chhoḌ kar apne jahan ko ham na pachhtavenge kya
dhimi dhimi aanch si rahti hai siine men mudam
mom ki manind ik din ham pighal javenge kya
kyon ba-zid ho tum bhi mere saath chalne ke liye
chalte chalte paanv men chhale na paḌ javenge kya
dam-ba-dam ham jal rahe hain agahi ki aanch men
aur is se baḌh ke aḳhir ham saza pavenge kya
ik na.i manzil ki janib tha safar ka silsila
raftagan ab is jahan men lauT kar avenge kya
Leave a Reply