Mela Ram Wafa
kisi dard-mand ki huun sada kisi dil-jale ki pukar huun
jo bigaḌ gaya vo nasib huun jo ujaḌ ga.i vo bahar huun
koi mujh pe phuul chaḌha.e kyuun koi mujh pe sham.a jala.e kyuun
koi mere paas bhi aa.e kyuun ki main hasraton ka mazar huun
bhala mujh pe Dha.en to Dha.en kya sitam ab zamane ki andhiyan
main bujha hua sa charagh huun main miTa hua sa ghubar huun
kahun kya hai kya miri zindagi ye hai zindagi koi zindagi
vo hai dushman-e-dil-o-jan mira dil-o-jan se jis pe nisar huun
shab-o-roz lab pe hai ai ‘vafa’ ye dua ki maut hi de ḳhuda
jo yahi hai mere nasib men ki asir-e-dam-e-bala rahun
Leave a Reply