kab tak is pyaas ke sahra men jhulaste jaa.en
ab ye badal jo uThe hain to baraste jaa.en
kaun batla.e tumhen kaise vo mausam hain ki jo
mujh se hi duur rahen mujh men hi baste jaa.en
ham se azad-mizajon pe ye uftad hai kya
chahte jaa.en use ḳhud ko taraste jaa.en
haa.e kya log ye abad hue hain mujh men
pyaar ke lafz likhen lahje se Daste jaa.en
aa.ina dekhun to ik chehre ke be-rang nuqush
ek nadida si zanjir men kaste jaa.en
juz mohabbat kise aaya hai mayassar ‘ummid’
aisa lamha ki jidhar sadiyon ke raste jaa.en
Leave a Reply