Jism Ke Martaban Mein Kya Hai

jism ke martaban men kya hai

ruuh hai bas makan men kya hai

ruuh kya hai khuda ko hai maalum

apne vahm-o-guman men kya hai

ik junun hai jo saath chalta hai

kashti-o-badban men kya hai

us ko meri ana se jhagda hai

varna meri zaban men kya hai

be-gunahon ke khuun ka pyasa tiir

aur us ki kaman men kya hai

ek vaada jo sab se sasta hai

aur dene ko daan men kya hai

kuchh haqaeq ke zinda paikar hain

lafz men kya bayan men kya hai

Leave a Comment