Khaleel Tanveer
rusva hue zalil hue dar-ba-dar hue
haq baat lab pe aa.i to ham be-hunar hue
kal tak jahan men jin ko koi puchhta na tha
is shahr-e-be-charagh men vo mo’tabar hue
baḌhne lagi hain aur zamanon ki duriyan
yuun fasle to aaj bahut muḳhtasar hue
dil ke makan se ḳhauf ke saa.e na chhaT sake
raste to duur duur talak be-ḳhatar hue
ab ke safar men dard ke pahlu ajiib hain
jo log ham-ḳhayal na the ham-safar hue
badla jo rang vaqt ne manzar badal ga.e
ahan-misal log bhi zer-o-zabar hue
Leave a Reply