dil ki rudad nigahon se bayan hoti hai
dard-mandon ki ḳhamoshi men zaban hoti hai
ḳhud-faramosh na jab tak ho koi kya samjhe
be-nishani bhi mohabbat men nishan hoti hai
naqsh-e-ummid hain ban ban ke bigaḌte kya kya
zindagi raqs-gah-e-reg-e-ravan hoti hai
jo tire husn-e-nazar-gir se shadab nahin
un baharon ke muqaddar men ḳhizan hoti hai
vo bura vaqt mohabbat men na dekhe koi
jab mohabbat bhi tabi.at pe garan hoti hai
yuun bhi hoti hai tire gham ki navazish aksar
lab pe hoti hai hansi dil men fughan hoti hai
jan-nisari se hai tauqir-e-mohabbat lekin
dekhna ye hai ki takmil kahan hoti hai
ham vahan ho ke bhi maujud kahan hote hain
ham-nashinon men tiri baat jahan hoti hai
chaunk uThta hai gham-e-hijr ka ehsas ‘rishi’
un ke aane pe bhi taskin kahan hoti hai
Leave a Reply