girani-zada ḳhaak meri baḌi hai
jahan par paḌi thi vahin par aḌi hai
agar huun main zinda to miTTi se meri
jo mar ja.un to laash isi men gaḌi hai
ise is qadar kyon sambhale rakha hai
ye miTTi ki hanDi to ḳhali paḌi hai
bahut der se aa.ina hai bulata
ḳhudi se taqabul ki aa.i ghaḌi hai
mujhe Dar nahin rahon ki pech-o-ḳham ka
har ik moḌ par meri qismat khaḌi hai
tu ḳhayyat ki yuun malamat na karna
qaba ki siyahi sitaron jaḌi hai
kabhi thaam le aur kabhi tu baḌha de
‘nava’ yuun hi hathon ki juḌti kaḌi hai
Leave a Reply