Jahan Ghar Hoga Dar Hoga Hamara

jahāñ ghar hogā dar hogā hamārā

vahāñ se kab guzar hogā hamārā

agar ham haiñ sitāroñ ke asar meñ

sitāroñ par asar hogā hamārā

tumheñ niiñd aa rahī hai shaam hī se

tamāshā raat bhar hogā hamārā

nikāle jā.eñge pahlū hazāroñ

fasāna muḳhtasar hogā hamārā

na kāTeñ raat kyūñ-kar us galī meñ

vahāñ ḳhvāb-e-sahar hogā hamārā

ye jo Darne lagā hai ham se dushman

ḳhudā pesh-e-nazar hogā hamārā

Leave a Comment