shafiq mausamon ko ham ne ru-siyah kiya
zamin ko gardishon ka markaz-e-nigah kiya
pakaḌ ke ḳhud ko gale se saval karta huun
hara-bhara ye jahan kis liye tabah kiya
jabin ko chuum ke main ne uluhi lamhon men
tumhare dil ko mohabbat ki bargah kiya
azaab aa gaya sar par to ab gila kaisa
tumhen hava ne ka.i baar intibah kiya
bana.en haath ko kaasa to hairaten kaisi
hami ne duzd faqiron ko badshah kiya
murad mangti hain roz chuum kar chehra
javan beTon ko maaon ne ḳhanqah kiya
Leave a Reply