pahaDon Ki Bulandi Par khaDa Hun

pahāḌoñ kī bulandī par khaḌā huuñ

zamīñ vāloñ ko chhoTā lag rahā huuñ

har ik raste pe ḳhud ko DhūñDhtā huuñ

maiñ apne aap se bichhḌā huā huuñ

bhare shahroñ meñ dil Darne lagā thā

ab aa kar jañgaloñ meñ bas gayā huuñ

tū hī markaz hai merī zindagī kā

tire atrāf misl-e-dā.era huuñ

ujāle jab se katrāne lage haiñ

siyah-rātoñ kā sāthī ban gayā huuñ

marāhim shakl kab kā mar chukā hai

mujhe mat chheḌiye maiñ dūsrā huuñ

Leave a Comment