zafar-iqbal

Chamke Ga Abhi Mere Khayalat Se Aage

chamke ga abhi mere khayalat se aage

vo naqsh ki tha dagh-e-mulaqat se aage

lagta hai ki mushkil hai abhi din ka nikalna

hai raat koi aur bhi is raat se aage

is vahm se vapas nahin palta huun ki hoga

kuchh aur bhi is khvab-e-tilismat se aage

aram se pichhe vo hata deta hai mujh ko

badhta huun agar us ki hidayat se aage

dauran-e-safar karta huun aram bhi lekin

hota huun thaharne ke maqamat se aage

uqda isi khatir koi hota hi nahin hal

hain saare savalat javabat se aage

agah kiya hai to hue aur bhi ghafil

vaqif jo nahin the mire halat se aage

ho sakta hai kya koi bhala un ke barabar

rahte hain jo khud apne bayanat se aage

itna bhi bahut hai jo ‘zafar’ qahat-e-nava men

nikli hai koi baat miri baat se aage

More Poems

Leave a Comment