Kyun Malamat Ka Hadaf Gardish-E-Paimana Bane

kyuuñ malāmat kā hadaf gardish-e-paimāna bane

laġhzish-e-pā se mirī ka.aba-o-but-ḳhāna bane

aql ke bas kī nahīñ baḳhiyā-girī phūloñ kī

dard jis ko ho gulistāñ kā vo dīvāna bane

lab-e-hikmat se shab-o-roz ujāle Tapke

tīra-zehnī kā magar ye bhī mudāvā na bane

be-sabab shauq nahīñ mā.il-e-afsāna-garī

har haqīqat kī ye ḳhvāhish hai ki afsāna bane

ruḳh-e-jānāñ ke tasavvur hī meñ rāteñ guzrīñ

chāñd-tāre dil-e-mahjūr kī duniyā na bane

āshnā fasl-e-bahārāñ hī nahīñ hai shāyad

kyā kahīñ phuul ki kyuuñ sabza-e-begāna bane

maiñ to huuñ sham-sifat-soz sarāpā ‘shiblī’

jis ko jalnā nahīñ aatā ho vo parvāna bane

Leave a Comment