Poet
mashiyyat kis ke bas men faza se kaun laḌta hai
yahan jo sar uThata hai use jhukna hi paḌta hai
chala huun dair se su-e-haram lekin ye aalam hai
ki jaise koi rah rah kar mira daman pakaḌta hai
haqiqat se baghavat uljhanon men Daal deti hai
ye sauda laakh sasta ho magar mahnga hi paḌta hai
janab-e-shaiḳh ne parda uThaya is haqiqat se
ki ik aalim bigaḌta hai to ik aalam bigaḌta hai
nasheman luT chuka radd-e-amal ka intizar ab hai
bhala ghar dekhiye sayyad ka kab tak ujaḌta hai
yaqin ki aag men tapti hai jab ruh-e-ḳhudi barson
kahin tab ja ke sho.ala phuul ki surat pakaḌta hai
kahin Thokar na kha jaana ki munh par aankh rakhte ho
haram ki raah men ‘faruq’ but-ḳhana bhi paḌta hai
Leave a Reply