Poet
dil-e-betab ko bahla chuki huun
sitare asman se la chuki huun
nigah-e-kahkashan se puchh lena
shua-e-zindagani pa chuki huun
ḳhirad ki tang vaadi se nikal kar
junun ki manzilat apna chuki huun
andheron men charaghan karne vaalo
ujalon men andhera pa chuki huun
zamin ki pastiyon ko kyuun gila hai
jinhen main asman batla chuki huun
jahan par aql ruk jaati hai aksar
tasavvur men vahan tak ja chuki huun
tire kirdar men muzmar hai azmat
tujhe ai zindagi samjha chuki huun
mohabbat sirf ruhani kashish hai
gham-e-hasti tujhe apna chuki huun
shu.ur-e-zist na-mumkin nahin hai
nigah maut ko sharma chuki huun
azizo ba-vafa fazl-e-ḳhuda se
maqam-e-bandagi apna chuki huun
Leave a Reply