Nilofar Noor
ghair mumkin hai ki ghaflat koi sayyad kare
kaun hoga jo mujhe qaid se azad kare
ḳhauf aisa ki kahin phir na bhula de mujh ko
sochti huun ki kahin phir na mujhe yaad kare
zabt itna ki main dulhan bhi saja sakti huun
shart itni ki mohabbat se vo irshad kare
vo har ik baat se chahe to mukar sakta hai
kya zaruri hai ki har baat pe hi saad kare
kaun kahta hai mira naam liya hai us ne
us se kahna ki zara phir se vo irshad kare
ham tire samne rone bhi nahin a.enge
tu sitam roz naya shauq se ijad kare
‘nur’ rakhti hai pahaḌon sa kaleja lekin
kya kare yaad tujhe jab dil-e-barbad kare
Leave a Reply