Shahryar
ham padh rahe the khvab ke purzon ko jod ke
andhi ne ye tilism bhi rakh daala tod ke
aghaz kyuun kiya tha safar in khalaon ka
pachhta rahe ho sabz zaminon ko chhod ke
ik buund zahr ke liye phaila rahe ho haath
dekho kabhi khud apne badan ko nichod ke
kuchh bhi nahin jo khvab ki surat dikhai de
koi nahin jo ham ko jagae jhinjhod ke
in paniyon se koi salamat nahin gaya
hai vaqt ab bhi kashtiyan le jaao mod ke
Leave a Reply