Abdul Ahad Saaz
darakht ruuh ke jhume parind gaane lage
hamen udhar ke manazir nazar bhi aane lage
khush-amdid ka manzar ghurub-e-sham men tha
dar-e-shafaq pe farishte se muskurane lage
firaq o vasl ke ma-bain ye saman jaise
udaas lai men koi hamd gungunane lage
main ek saat-e-be-khud men chhu gaya tha jise
phir us ko lafz tak aate hue zamane lage
khabar ke mod pe sang-e-nishan thi be-khabari
thikane aae mire hosh ya thikane lage
muhib raste sarhad ki samt jaate hue
zara sa aur chale ham to vo suhane lage
ik apne-ap se milna tha ‘saz’ jis ke liye
riqabaten huiin darkar dostane lage
Leave a Reply