Abbas Qamar
halat-e-hal se begana bana rakkha hai
khud ko maazi ka nihan-khana bana rakkha hai
khauf-e-dozakh ne hi ijad kiya hai sajda
dar ne insan ko divana bana rakkha hai
mimbar-e-ishq se taqrir ki khvahish hai hamen
dil ko is vaste maulana bana rakkha hai
matam-e-shauq bapa karte hain har shaam yahan
jism ko ham ne azan-khana bana rakkha hai
vaqt-e-rukhsat hai mire chahne valon ne bhi ab
saans ko vaqt ka paimana bana rakkha hai
jante hain vo parinda hai nahin thahrega
ham ne us dil ko magar daana bana rakkha hai
Leave a Reply