Batae deti Hai Be-Puchhe Raaz Sab dil Ke

Bedam Shah Warsi

batae deti hai be-puchhe raaz sab dil ke

nigah-e-shauq kisi ki nigah se mil ke

nikale hausle maqtal men apne bismil ke

nisar tegh ke qurban aise qatil ke

main us pe sadqe jo jaae kisi ki yaad men jaan

kisi ko chahe main qurban jaun us dil ke

badi adaon se li jaan apne kushte ki

hazar baar main qurban apne qatil ke

ghubar-e-qais nahin hai to kaun hai laila

koi to hai ki jo phirta hai gird mahmil ke

vo phuut bahne men mashshaq hain ye rone men

rahenge dab ke na ankhon se aable dil ke

mahar-e-naqa-e-laila tu khinch le ai aah

hata de dast-e-talab badh ke parde mahmil ke

vo dil men hain magar ankhon se duur hain ‘bedam’

pada hua huun main pyasa qarib sahil ke