Ajab Ek Taur Hai Jo Hum Sitam Ijad Rakhen

ajab ik taur hai jo ham sitam ijad rakhen

ki na us shakhs ko bhulen na use yaad rakhen

ahd is kucha-e-dil se hai so us kuche men

hai koi apni jagah ham jise barbad rakhen

kya kahen kitne hi nukte hain jo barte na gae

khush-badan ishq karen aur hamen ustad rakhen

be-sutun ik navahi men hai shahr-e-dil ki

tesha inaam karen aur koi farhad rakhen

ashiyana koi apna nahin par shauq ye hai

ik qafas laaen kahin se koi sayyad rakhen

ham ko anfas ki apne hai imarat karni

is imarat ki labon par tire buniyad rakhen

Leave a Comment