ek diya dahliz pe rakkha bhuul gaya
ghar ko lauT ke aane vaala bhuul gaya
ye kaisi be-ab zamin ka samna tha
ḳhud ko qatra qatre ko dariya bhuul gaya
main to tha maujud kitab ke lafzon men
vo hi shayad mujh ko paḌhna bhuul gaya
kis ke jism ki barish ne sairab kiya
kyuun uḌna mausam ka parinda bhuul gaya
aḳhir ye hona tha aḳhir yahi hua
duniya mujh ko aur main duniya bhuul gaya
main bhi huun mansub kisi ke qatl se ab
suraj meri chhat pe chamakna bhuul gaya
vafa ka khoTa sikka kab tak chalta ‘tur’
achchha hua jo apna paraya bhuul gaya
Leave a Reply