hai tarjuman alam aur adiib hai sardi
tabhi to nok-e-qalam se qarib hai sardi
dimagh arsh pe hai kanpta zamin pe hai
ai bande dars le umda ḳhatib hai sardi
main shaal oḌh ke jo baam par Tahalti huun
payam-e-dost ki shayad naqib hai sardi
larazti kanpti main ḳhud se kahti rahti huun
main milne ja.un to kaise raqib hai sardi
hava bhi sard hai patjhaḌ bhi hai daraḳhton par
firaq-o-hijr men lipTi ajiib hai sardi
basi hui hai faza men vo farhat-angezi
sulagte zaḳhmon ki behtar tabib hai sardi
‘sabila’ mausam-e-sarma bhi ek ne.amat hai
vo ḳhush-nasib hain jin ko nasib hai sardi
Leave a Reply