Sahir Dehlavi
hausla vaj.h-e-tapish-ha-e-dil-o-jan na hua
shola-e-sham.a tiri bazm men raqsan na hua
husn tha mast-e-azal jam-e-ana laila se
tan ki uryani se majnun koi uryan na hua
lab-e-mansur se di kis ne anal-haq ki sada
tu agar parda-e-pindar men pinhan na hua
ham rahe chashm-e-inayat se hamesha mahrum
dil-nashin tir-e-nazar ka koi paikan na hua
chashm-e-janan men samate hain samane vaale
maut se aankh laḌana koi asan na hua
dil hai but-ḳhana-e-asnam-e-ḳhayali ‘sahir’
tu vo kafir hai ki bhule se musalman na hua
Leave a Reply