badal ja.ega sab kuchh ye tamasha bhi nahin hoga
nazar aa.ega vo manzar jo socha bhi nahin hoga
har ik lamha kisi shai ki kami mahsus bhi hogi
kahin bhi duur tak koi ḳhala sa bhi nahin hoga
vo ankhen bhi nahin hongi kahen jo an-kahi baten
hava men sabz anchal ka vo lahra bhi nahin hoga
simaT ja.egi duniya sa.at-e-imroz men ik din
shumar-e-zist men diroz o farda bhi nahin hoga
magar qad roz o shab ka dekh kar hairan sab honge
madar apna zamin ne garche badla bhi nahin hoga
ajab viraniyan abad hongi qarya-dar-qarya
shajar shaḳhon pe chiḌiyon ka basera bhi nahin hoga
Leave a Reply