Poet
zulm karte hue vo shaḳhs larazta hi nahin
jaise qahhar ke ma.ani vo samajhta hi nahin
jitna bhi baanT sako baanT do is daulat ko
ilm ik aisa ḳhazana hai jo ghaTta hi nahin
hindu milta hai musalman bhi isa.i bhi
lekin is daur men insan to milta hi nahin
mera bachcha bhi alag fikr ka malik nikla
jo kabhi naqsh-e-qadam dekh ke chalta hi nahin
is qadar sard-mizaji hai musallat ham par
koi bhi baat ho ab ḳhuun ubalta hi nahin
kis tarah utrega angan men qamar ḳhushiyon ka
gham ka suraj kabhi divar se Dhalta hi nahin
miT nahin sakta kabhi daman-e-tariḳh se daagh
ḳhun-e-mazlum kabhi ra.egan hota hi nahin
Leave a Reply