Ahmad Faraz

Agar Ye Sab Kuchh Nahin

mile to ham aaj bhi hain lekin

na mere dil men vo tishnagi thi

ki tujh se mil kar kabhi na bichhdun

na aaj tujh men vo zindagi thi

ki jism-o-jan men ubaal aae

na khvab-zaron men raushni thi

na meri ankhen charagh ki lau

na tujh men hi khud-supurdagi thi

na baat karne ki koi khvahish

na chup hi men khub-surati thi

mujassamon ki tarah the donon

na dosti thi na dushmani thi

mujhe to kuchh yuun laga hai jaise

vo saaten bhi guzar gai hain

ki jin ko ham la-zaval samjhe

vo khvahishen bhi to mar gai hain

jo tere mere lahu ki hiddat

ko akhirash barf kar gai hain

mohabbaten shauq ki chatanon

se ghatiyon men utar gai hain

vo qurbaten vo judaiyan sab

ghubar ban kar bikhar gai hain

agar ye sab kuchh nahin to batla

vo chahaten ab kidhar gai hain

Leave a Comment