Hakeem Nasir
kabhi vo haath na aaya havaon jaisa hai
vo ek shaḳhs jo sach-much ḳhudaon jaisa hai
hamari sham-e-tamanna bhi jal ke ḳhaak hui
hamare sho.alon ka aalam chitaon jaisa hai
vo bas gaya hai jo aa kar hamari sanson men
jabhi to lahja hamara duaon jaisa hai
tumhare ba.ad ujale bhi ho ga.e ruḳhsat
hamare shahr ka manzar bhi gaanv jaisa hai
vo ek shaḳhs jo ham se hai ajnabi ab tak
ḳhulus us ka magar ashnaon jaisa hai
hamare gham men vo zulfen bikhar ga.iin ‘nasir’
jabhi to aaj ka mausam bhi chhanv jaisa hai
Leave a Reply