Niyaz Husain Lakhwera
andheri shab hai zarurat nahin batane ki
miri taraf se ijazat hai lauT jaane ki
koi to ho jo mizaj-e-ashna-e-dilbar ho
kisi ke paas to chabi ho is ḳhazane ki
vo chahta to mujhe sang-dil bana deta
zyadti mire dil par mire ḳhuda ne ki
main dusron ke gharon ko bacha raha huun magar
kisi ko fikr nahin mera ghar bachane ki
main apne aap se munkir hua to TuuT gaya
ye dushmani mire andar ki intiha ne ki
jise harif samajh kar kiya hai qatl ‘niyaz’
vo aabru tha usi be-nava gharane ki
Leave a Reply