ishq ka rog to virse men mila tha mujh ko
dil dhaḌakta hua siine men mila tha mujh ko
haan ye kafir usi hujre men mila tha mujh ko
ek momin jahan sajde men mila tha mujh ko
us ko bhi meri tarah apni vafa par tha yaqin
vo bhi shayad isi dhoke men mila tha mujh ko
us ne hi bazm ke adab sikha.e the mujhe
vo jo ik shaḳhs akele men mila tha mujh ko
manzil-e-hosh pe ik main hi nahin tha tanha
yaan to har shaḳhs hi nashshe men mila tha mujh ko
ye bhi ik aib tha meri hi nazar ka shayad
roz kuchh farq sa chehre men mila tha mujh ko
aise halat men kya us se gila karta main
raat suraj bhi andhere men mila tha mujh ko
main agar Duub na jaata to vahan kya karta
ik samundar tha jo qatre men mila tha mujh ko
ruuh ki pyaas bujhana koi asan na tha
saaf paani baḌe gahre men mila tha mujh ko
sach to ye hai ki yahan koi bhi manzil hi na thi
vo bhi rasta tha jo raste men mila tha mujh ko
Leave a Reply