dil ki kuduraten agar insan se duur hon
saare nifaq gabr o musalman se duur hon
nazdik aa chuki hai savari bahar ki
barg-e-khizan-rasida gulistan se duur hon
dil is qadar gudaz hai barson hi gham rahe
aansu jo apne dida-e-giryan se duur hon
mitta nahin navishta-e-qismat kisi tarah
jauhar kabhi na khanjar-e-burran se duur hon
fasl-e-bahar aai hai kapdon ko phadiye
dil ke bukhar dast-o-gareban se duur hon
chhidkav ka irada hai chashm-e-pur-ab ka
gard-o-ghubar kucha-e-janan se duur hon
ye tang kar raha hai to uljha rahe hain vo
daman ke paat pahle gareban se duur hon
vahsh o tuyur ko miri aahen karen halak
ab-o-giyah koh-o-bayaban se duur hon
mumkin nahin najat asiran-e-ishq ko
ye qaidi vo nahin ki jo zindan se duur hon
muddat ke baad aae hain sahra men ai junun
do aable to khar-e-mughilan se duur hon
gardish se chashm-e-yar ke ‘atish’ ajab nahin
jo jo amal ki gardish-e-dauran se duur hon
Leave a Reply