Navneet Sharma
ab pasar aa.e hain rishton pe kuhase kitne
ab jo ghurbat men hai naani to navase kitne
choT khaa.e hue lamhon ka sitam hai ki use
ruuh ke chehre pe dikhte hain muhanse kitne
sach ke qasbe pe miyan jhuuT ki sardari hai
ab aTakte hain labon par hi ḳhulase kitne
the bahut ḳhaas jo sar taan ke chalte the yahan
ab isi shahr men vaqif hain ana se kitne
ab bhi andar mire dil hai jo dhaḌakta hai miyan
varna bazar men bikte hain dilase kitne
mosla-dhar barasti miri ankhen sab chup
us ki ankhon men nami hai to hain pyase kitne
Leave a Reply