aap jab chehra badal kar aa ga.e
sach to ye hai ham bhi dhoka kha ga.e
aap ab aa.e hain fasl-e-gul ke ba.ad
phuul jab ummid ke murjha ga.e
ashk kya chhalke hamari aankh se
lafz bhi avaz men bal kha ga.e
ham tumhare aa.ine men qaid the
tum to bas bekar men ghabra ga.e
toḌ laa.e shisha-e-dil phir kahin
tum andhere men kahan Takra ga.e
aap ne gham hi diye bas gham hamen
aap kab ḳhushiyan yahan barsa ga.e
Leave a Reply