Iqbal Sajid
muund kar ankhen talash-e-bahr-o-bar karne lage
log apni zaat ke andar safar karne lage
manjhiyon ke giit sun kar aa gaya dariya ko josh
sahilon pe raqs tezi se bhanvar karne lage
baḌh gaya hai is qadar ab surḳh-ru hone ka shauq
log apne ḳhuun se jismon ko tar karne lage
bandh de shaḳhon se tu miTTi ke phal kaghaz ke phuul
ye taqaza raah men ujḌe shajar karne lage
gaanv men kachche gharon ki qimaten baḌhne lagin
shahr se naql-e-makani ahl-e-zar karne lage
jaise har chehre ki ankhen sar ke pichhe aa lagin
sab ke sab ulTe hi qadmon se safar karne lage
ab paḌhe-likkhe bhi ‘sajid’ aa ke bekari se tang
shab ko divaron pe chaspan poster karne lage
Leave a Reply