Akhlaque Bandvi
falak se chand chaman se gulab le aae
kahan se koi tumhara javab le aae
hazar rang hain husn-o-jamal ke lekin
vo rang aur hai jis ko shabab le aae
ajiib turfa-tamasha hai zindagi meri
ḳhushi bhi aae to gham be-hisab le aae
tire ḳhamir men shamil hai gumrahi varna
falak se kitne payambar kitab le aae
idhar vo tishna-labi hai ki jan-ba-lab hain ham
udhar vo dast-e-karam par sarab le aae
usi ki aaj bhi rahti hain muntazir ankhen
jo aa bhi jaae to sad iztirab le aae
ye sher-goi hai ‘aḳhlaq’ koi khel nahin
kare vo mashq jo chhalni men aab le aae
Leave a Reply